ஸ்ரீ ராகவேந்திரர்

சங்குகர்ணன், பிரகலாதன், பாக்லீகர் [அ] பாஹ்லீகன், வியாசராஜ தீர்த்தர் ஆகியோரின் வரிசையான அவதாரமே பூஜ்ய ஸ்ரீ ராகவேந்திரர் என்பது ஒரு பிரபலமான நம்பிக்கை. தனது முந்தைய அவதாரத்தில் பூஜ்ய ஸ்ரீ ராகவேந்திரர், ஸ்ரீ வியாசராஜராக இருந்தார். அந்த அவதாரத்தில் ஆஞ்சநேயப் பெருமானுக்கு 732 ஆலயங்களை நிறுவி, வெங்கடேஸ்வரப் பெருமானை நேரில் வழிபட்டவர். இந்த அவதாரத்தில் பூஜ்ய ஸ்ரீ ராகவேந்திரருக்கு வெங்கடநாதன் என்று பெயரிடப்பட்டதும், அவர் வெங்கடேஸ்வரப் பெருமானின் பக்தராக இருந்ததும் ஆச்சரியமல்ல.

இந்த மாபெரும் துறவியைப் பற்றியும் அவரது வாழ்க்கையைப் பற்றியும் மேலும் அறிய, எங்கள் ஆங்கில இணையதளத்தில் உள்ள "ஹனுமத் பக்தர்களின் சுருக்கமான வாழ்க்கை வரலாறு - பூஜ்ய ஸ்ரீ ராகவேந்திர குரு" பக்கத்தினைப் பார்க்கவும்.

ஸ்ரீ ராகவேந்திர சுவாமி பிருந்தாவனம்

துவைத தத்துவத்தைப் பின்பற்றும் துறவிகள், இந்த பூவுலக வாழ்விலிருந்து விடுபட்டு ஜீவன் முக்தியை அடையத் தாங்கள் விரும்பிய ஒரு புனிதமான இடத்தைத் தேர்ந்தெடுப்பார்கள். அவ்வாறு தேர்ந்தெடுக்கப்பட்ட புனிதமான இடத்தில் ஒரு துளசிச் செடி நடப்பட்டு, அந்தத் துறவியின் அருளைப் பெறுவதற்காக அந்த இடம் வழிபடப்படுகிறது. துறவி ஸ்ரீ ராகவேந்திரர் மஞ்சலே என்ற கிராமத்தைத் தனது இறுதி ஓய்விடமாகத் தேர்ந்தெடுத்தார்.

இன்று அவரது பிருந்தாவனம் அமைந்துள்ள மஞ்சலே கிராமம் "மந்த்ராலயம்" என்று அழைக்கப்படுகிறது.

வாழும் துறவி

சுமார் 350 ஆண்டுகளுக்கு முன்பு பிருந்தாவனத்தில் பிரவேசித்த பிறகும், அவர் தனது பக்தர்களின் அழைப்பிற்குப் பதிலளிக்க உயிருடன் இருப்பதாக நம்பப்படுகிறது. அவரது பக்தர்கள் அனைவரும் தங்கள் குருவின் அருளைப் பெற மந்த்ராலயத்திற்குப் பயணிக்க முடியாததால், அவரது பிருந்தாவனத்திலிருந்து புனிதமான மண்ணை எடுத்து வந்து, அதை "மிருத்திகா பிருந்தாவனமாக" வழிபடும் வழக்கம் உருவானது. இன்று இந்தியாவில் இது போன்ற பல மிருத்திகா பிருந்தாவனங்கள் உள்ளன. அத்தகைய பழமையான மிருத்திகா பிருந்தாவனங்களில் ஒன்று தமிழ்நாட்டின் ஈரோட்டில் அமைந்துள்ளது. சுமார் 350 ஆண்டுகளுக்கு முன்பு பிருந்தாவனத்தில் பிரவேசித்த போதிலும், அவர் இன்றும் உயிருடன் இருந்து, தனது பக்தர்களின் அழைப்பிற்குப் பதிலளிப்பதாகக் கூறப்படுகிறது.

ஈரோடு

இந்த நகரம் தற்போதைய தமிழ்நாட்டின் மேற்குப் பகுதியில் காவேரி ஆற்றின் கரையில் அமைந்துள்ளது. இந்த இடத்திற்கு ஒரு நீண்ட வரலாறு உண்டு. ஒரு காலகட்டத்தில், துவைத தத்துவத்தின் பல அறிஞர்களும் துறவிகளும் இந்த நகரத்தில் வாழ்ந்து வந்தனர். ஈரோட்டின் வரலாறு மற்றும் துவைதத் துறவிகளின் செல்வாக்கு பற்றிய கூடுதல் தகவல்களை எங்கள் வலைப்பக்கமான "முல்பாகல் மடம், நவ பிருந்தாவனம்" என்பதில் காணலாம்.

காவேரி கரை ஆஞ்சநேயர் கோவில்

பக்தர்கள் தாங்கள் வழிபாட்டு தலத்தில் இருக்கும் புனித ஆற்றில் நீராடுவது வழக்கம். ஈரோடு வழியாகப் பாயும் காவேரி ஆறு புனிதமானதாகக் கருதப்படுகிறது, எனவே பல பக்தர்கள் இங்குள்ள ஆற்றில் நீராட வருவார்கள். ஆற்றில் நீராடிய பிறகு, தங்களுக்கு விருப்பமான தெய்வத்தை வழிபடுவதும் ஒரு வழக்கமாகும். இங்கு மத்வ தத்துவத்தைப் பின்பற்றுபவர்கள் பலர் இருந்ததால், அவர்கள் ஆற்றங்கரையில் ஸ்ரீ முக்யபிராணனுக்காக [ஸ்ரீ ஆஞ்சநேயர்] ஒரு சிறிய கோவிலைக் கட்டியிருந்தனர். இந்தக் கோவிலுக்கு ஒரு கோபுரம் இருந்தது, அதற்கு முன்பாக ஒரு கல் மண்டபம் இருந்தது. அங்கு அவர்கள் தங்கள் வழக்கப்படி பிரார்த்தனைகளைச் செய்து வந்தனர்.

ஸ்ரீ ராகவேந்திரரின் மிருத்திகா பிருந்தாவனம்

மந்திராலயத்தில் ஸ்ரீ ராகவேந்திர தீர்த்தர் பிருந்தாவனத்தில் பிரவேசித்த பிறகு, பக்தர்கள் அங்கே சென்று அஞ்சலி செலுத்துவது வழக்கம். பக்தர்கள் மந்திராலயத்திற்குச் செல்ல விரும்பினாலும், ஈரோடு மற்றும் அதைச் சுற்றியுள்ள அனைத்து பக்தர்களாலும் மந்திராலயத்திற்குச் சென்று பிரார்த்தனை செய்ய இயலாது. எனவே, பெரியோர்களுடன் கலந்தாலோசித்த பிறகு, ஈரோடு மற்றும் அதைச் சுற்றியுள்ள பக்தர்களின் நலனுக்காக, மந்திராலயத்திலிருந்து புனித மண்ணைக் கொண்டு வந்து ஈரோட்டில் ஒரு "மிருத்திகா பிருந்தாவனத்தை" நிறுவ முடிவு செய்யப்பட்டது.

மந்திராலயத்திலிருந்து புனித மண்ணை, பரிந்துரைக்கப்பட்ட சடங்குகளிலிருந்து சிறிதும் வழுவாமல், அனைத்து மத பக்தியுடனும் ஈரோட்டிற்குக் கொண்டு வரும் பணியை ஈரோட்டைச் சேர்ந்த வேத அறிஞரான ஸ்ரீ ராமாச்சார் மேற்கொண்டார். ஸ்ரீ ராகவேந்திர குரு மந்திராலயத்தில் பிருந்தாவனத்தில் பிரவேசித்து சுமார் அறுபது ஆண்டுகளுக்குப் பிறகு, ஸ்ரீ ராமாச்சார் இந்த முயற்சியை மேற்கொண்டார். வழியில் உள்ள கிராமங்கள் மற்றும் நகரங்களின் பக்தர்களின் பங்களிப்புடன் புனித மண் மந்திராலயத்திலிருந்து ஈரோட்டிற்குக் கொண்டு வரப்பட்டது. கிராம மக்கள் அனைத்து மத ஏற்பாடுகளையும் செய்து, அந்தப் பவனிக்குச் சீரான பயணத்தை எளிதாக்கினர். இவ்வாறு மந்திராலயாவிலிருந்து கொண்டுவரப்பட்ட புனித மண் கொண்டு, காவேரி ஆற்றங்கரையில், ஸ்ரீ முக்யபிராணர் கோயிலுக்கு அருகில் ஒரு சிறிய பிருந்தாவனம் நிறுவப்பட்டது. இந்த ஸ்ரீ ராகவேந்திர மிருத்திகா பிருந்தாவனம் தமிழ்நாட்டில் நிறுவப்பட்ட முதல் பிருந்தாவனமும், நாட்டில் மூன்றாவது பிருந்தாவனமும் ஆகும். இந்த ஈரோடு பிருந்தாவனம், ஸ்ரீ ராகவேந்திர சுவாமியின் பல பக்தர்களை ஈர்த்தது.

மிருத்திகா பிருந்தாவனத்தின் புதுப்பித்தலும், புனரமைப்பதும்

சுமார் இருநூறு ஆண்டுகளுக்குப் பிறகு, மிருத்திகா பிருந்தாவனத்தைப் புதுப்பிக்க வேண்டிய தேவை உணரப்பட்டது. ஈரோட்டில் மகாஜனப் பள்ளியில் சமஸ்கிருத ஆசிரியராகப் பணியாற்றிய ஸ்ரீ மந்த்ராலயம் கிருஷ்ணாச்சார் இந்த முயற்சிக்கு முன்னெடுத்தார். இதற்காக அவர் பக்தர்களிடமிருந்து நன்கொடைகளைச் சேகரித்தார். 1912 ஆம் ஆண்டில், அவ்வாறு திரட்டப்பட்ட நன்கொடைகளைக் கொண்டு, அவர் முழு வளாகத்தையும், மேலும் மிருத்திகா பிருந்தாவனத்தையும் புதுப்பித்தார். மந்திராலயத்தில் உள்ள அதே மாதிரியில் ஏழு பீடங்களுடன் பிருந்தாவனம் மறுசீரமைக்கப்பட்டது குறிப்பிட தக்கது. புதுப்பித்தல் மற்றும் மறுசீரமைப்புக்குப் பிறகு கும்பாபிஷேகம் நடத்தப்பட்டது.

அதன்பிறகு கும்பாபிஷேகம்

1938 ஆம் ஆண்டில், ஸ்ரீ முக்யபிராணர் கோயிலுடன் இருந்த பழைய மண்டபம் சிதிலமடைந்த நிலையில் இருந்தது. இந்த மண்டபம் அகற்றப்பட்டு, அதே இடத்தில் முற்றிலும் புதிய மண்டபம் கட்டப்பட்டது. ராகவேந்திரர் கோயிலில் ராமர், சீதை மற்றும் ஆஞ்சநேயர் சிலைகளுடன் ராஜகோபுரம் கட்டப்பட்டது. இந்த அனைத்துப் புனரமைப்புப் பணிகளுக்குப் பிறகு, கும்பாபிஷேகம் நடத்தப்பட்டது.

அதன்பிறகு 2009 ஆம் ஆண்டில் புனரமைப்பு மற்றும் கும்பாபிஷேகம் நடைபெற்றது, தற்போது [ஜனவரி 2024] அடுத்த கும்பாபிஷேகத்திற்கான ஏற்பாடுகள் நடைபெற்று வருகின்றன.

காவேரி கரை ஸ்ரீ ஆஞ்சநேயர்

இந்த க்ஷேத்திரத்தின் ஸ்ரீ முக்யபிராணர் [ஸ்ரீ ஆஞ்சநேயர்] கோயிலுக்குக் கிழக்கே பாயும் காவேரி நதியை நோக்கியுள்ளார்.

முழு உருவச் சிலையாகச் செதுக்கப்பட்ட ஸ்ரீ ஆஞ்சநேயர் சிலை, ஒரு சதுர ஆவுடையாரின் மீது வைக்கப்பட்ட கவிழ்ந்த [தலைகீழ்] தாமரைப் பீடத்தில் நிறுவப்பட்டுள்ளது.

பெருமானின் கைகள் அஞ்சலி முத்திரையில் இருக்க, நின்ற கோலத்தில் காட்சியளிக்கிறார். பெருமான் தனது தாமரைப் பாதங்களில் தண்டையும் நூபுரமும் அணிந்துள்ளார். கச்சம் பாணியில் உடுத்தப்பட்ட வேட்டி ஒரு அலங்கார இடுப்புப் பட்டையால் பிடிக்கப்பட்டுள்ளது. கும்பிடும் கைகளில் மணிக்கட்டில் கங்கணமும், புஜத்தில் கேயூரமும் காணப்படுகின்றன. 'புஜ வளையம்' எனப்படும் ஓர் ஆபரணம் அவரது தோள்களை மூடியுள்ளது. அவரது மார்பில் இரண்டு மாலைகள் காணப்படுகின்றன. மௌஞ்சியுடன் கூடிய யக்ஞோபவீதமும் அவரது மார்பின் குறுக்கே காணப்படுகிறது. குமிழான கன்னங்கள் மற்றும் நீண்ட காதுகளுடன் கூடிய பிரகாசமான முகம் பக்தர்களின் கவனத்தை ஈர்க்கும் வகையில் உள்ளது. நீண்ட காதுகளில் காதணிகள் அசைவதைக் காணலாம். நேர்த்தியாகக் கட்டப்பட்ட கேசம் அவரது தலையில் உள்ள கிரீடத்தின் கீழ் மறைக்கப்பட்டுள்ளது. வால் பின்புறம் இருப்பதால் கண்ணுக்குத் தெரியவில்லை, அதன் நுனியில் ஒரு வளைவுடன் அவரது பாதங்களுக்கு அருகில் தொங்குகிறது.

 

 

தமிழாக்கம் : ::
பதிப்பு:  மார்ச் 2026

 

 

ஆஞ்சநேய ஸ்வாமி புகழ் வாழ்க